Шығыс Қазақстан облыстық Жастар театры екі бірдей фестивальге қатысуға жолдама алды. Театр ұжымы Айдын Салбановтың режиссерлігімен сахналанған Л. Разумовскаяның «Қымбатты Елена Сергеевна» драмасымен қыркүйек айының 2-8 аралығында Астана қаласында өтетін жас режиссерлердің Қайрат Сүгірбеков атындағы I Республикалық форум-фестивалі мен қыркүйек айының 11-16 аралығында Бішкек қаласында өтетін «ART-ORDA-2017» VI Халықаралық театр фестиваліне қатысатын болады. Жастар театры аталмыш спектакльмен Ақтөбе қаласында өткен ІІ Республикалық «Балауса» экспериментальды қойылымдар фестивалінде өнер көрсетіп, «Үздік актерлік ансамбль» номинациясымен марапатталған болатын. Өнер додасына аттанғалы отырған театр ұжымына сәттілік тілейміз!

Шығыс Қазақстан облыстық Жастар театрының труппасы жаңа актерлермен толықты. Астанадағы Қазақ Ұлттық өнер университетінде ҚР Еңбек сіңірген қайраткері, профессор Ақыш Омар Қоңыртайұлының және ҚР Еңбек сіңірген әртісі, профессор Құрманғожаев Бекболат Болатжанұлының шеберханаларынан білім алған тоғыз актер жаңа қойылымның дайындығына кірісіп кетті. Жас театрға жаңа леп алып келген актерлердің ойынын тамашалағыңыз келсе қыркүйек айының 22, 23 күндері К. Людвигтің «Бикештер» музыкалық комедиясының премьерасына келіңіздер!

Шығыс Қазақстан облыстық қазақ драма театрының ұжымы кезекті еңбек демалысынан соң, 21-25 шілде аралығында Астана қаласында өткен ЭКСПО – 2017 халықаралық көрмесіне қатысып, бүкіл әлем көзтіккен іс-шараның басы қасында болып, жұмысқа деген қабілеттерін молайтып, 18-ші театр маусымын Б. Мұқаевтың «Сергелдең болған серілер» атты 2 бөлімді комедиясымен ашуға дайындықты бастап кетті.